ધમાલ થઈ ગઈ…!– ગૌરાંગ ઠાકર
વસંત આવી, ધમાલ થઈ ગઈ,
બધા બગીચે બબાલ થઈ ગઈ..!
બધા જ લોકોએ મ્હેંક માંગી,
હવા પછી તો, હમાલ થઈ ગઈ.
સૂરજ ગયો છે ગુલાલ છાંટી,
આ સાંજ તેથી જ, લાલ થઈ ગઈ.
તમારી ઝળહળ સવાર માટે,
લ્યો, રાત આખી હલાલ થઈ ગઈ.
બધું જ વાંચી શકાય એવી,
પ્રણયમાં આંખો, ટપાલ થઈ ગઈ.
તમે હતાં થી, તમે ગયાં તે,
પળોની વચમાં, કમાલ થઈ ગઈ.
તમે જ મારી ગઝલ બનો ને,
કલમ હવે તો, મશાલ થઈ ગઈ.
- ગૌરાંગ ઠાકર
કોયલના ટહુકાઓનું અસ્તિત્વની આસપાસ રચાતું સરોવર એટલે વસંત… વસંત એટલે રંગ–રાગ અને પરાગની સૃષ્ટિ. વસંતોત્સવ એટલે પ્રણયોત્સવ એમ પણ કહેવાયું છે. ફૂલ અને ભમરાની બોલબાલાની આ ૠતુની માનવજીવન પર થતી અસરોના સ્પંદનો ઝીલવા કવિનો હાથ ઝાલ્યો ઝલાય ખરો..? અહીં કવિશ્રી ગૌરાંગભાઈએ પણ વસંતના અનેક રંગો રમતિયાળ શૈલીમાં રજૂ કર્યા છે. એમની આ અક્ષુણ્ણ ગઝલ માણીએ.
.
સુંદર ગઝલ…
સૂરજ ગયો છે ગુલાલ છાંટી,
આ સાંજ તેથી જ, લાલ થઈ ગઈ.
તમારી ઝળહળ સવાર માટે,
લ્યો, રાત આખી હલાલ થઈ ગઈ.
-સરસ અભિવ્યક્તિ !
Very nice Gazal.
Congratulations to Gaurangbhai and Pinkiben!
Sudhir Patel.
સુંદર ગઝલ રજૂ કરવા બદલ ધન્યવાદ. વસંત મુબારક.