હાઈકુ : સ્નેહરશ્મિ
હિમશિખરે
ફૂટે પરોઢ: અહો !
સૂર્ય હાઈકુ઼
* * *
ઊડી ગયું કો
પંખી કૂજતું : રવ
હજીયે નભે
* * *
ઝાપટું વર્ષી
શમ્યું, વેરાયો ચંદ્ર
ભીના ઘાસમાં.
* * *
વ્હેરાય થડ :
ડાળે માળા બાંધતાં
પંખી કૂજતાં.
* * *
ફરતી પીંછી
અંધકારની : દીપ
નહીં રંગાય.
* * *
પતંગિયું ત્યાં
થયું અલોપ : શૂન્ય
ગયું રંગાઈ.
* * *
ગીત આકાશે :
પંખીની પાંખમાંથી
ફૂટે પરોઢ.
- સ્નેહરશ્મિ
ગુજરાતી સાહિત્યમાં જાપાનીસ કાવ્યપ્રકાર હાઈકુનો પરિચય કવિશ્રી સ્નેહરશ્મિએ કરાવ્યો. આજે તેમનાં જન્મદિને ઝીણાદાદાને યાદ ન કરીએ તો કેમ ચાલે ? ખાદીનાં સફેદ ધોતી, ઝભ્ભામાં તેમનાં ઘર પાસે વૉક કરતાં હોય અને અમે તેમની સાથે વાતો કરતાં અને સી.એન.માં જ અભ્યાસ કર્યો હોવાથી પરીક્ષા હોય તો ઘરમાં જઈ પગે પણ લાગી આવતાં. તેમના પુત્ર સિદ્ધાર્થભાઈ સાથે વાત થઈ અને તે મુજબ તેમનો સંગ્રહ બહુ જલ્દીથી આપણને ડિજિટલ સ્વરુપે મળશે.
.
લાઘવમાં વિ પુ લ રજુઆતવાળા
હાઈકુ માણીએ અને સ્નેહરશ્મી યાદ આવે!
તેમના જન્મદિને કુશળ મંગળ અંગે પ્રભુ પ્રાર્થના.
અહીં પ્રસ્તુત હાઈકુમાંથી કેટલાક અભ્યાસક્રમમાં આવતા… આ નાના અમથા કાવ્યપ્રકારની કેવી અસર રહી ગઈ છે?! હજી વિસ્મરણ થયું નથી… સ્નેહરશ્મિના હાઈકુએ એ જમાનામાં અડધાથી વધારે ક્લાસને હાઈકુ રચતા કરી દીધો હતો…
સુંદર હાઈકુઓ… સાચી વાત છે, સ્કૂલનાં દિવસો યાદ આવી ગયા.
એમનાં ડિજિટલ સંગ્રહની રાહ જોવી જ રહી…!
તદ્દન સાચું,
યાદ છે તમામ
પુરાણી યાદો
મેં પણ શાળામાં એકાદ હાઈકુ બનાવેલું હતું. હાઈકુની અસર મન પર ઉંડે સુધી પડી છે.