ગઝલ : મુકુલ ચોકસી
આપણી અંદર મરી પરવારી ગયેલા કોઇએ,
બાગમાં પથ્થર બનીને જન્મ લેવો જોઇએ.
સ્વપ્નના ફાનસના અજવાળામાં જેને જોઇએ,
ખુલ્લી આંખોના આ અંધાપામાં તેને ખોઇએ.
ચાલુ ટ્રેને બારી પાસે બેસવાની વાતમાં,
બારીમાંથી કૂદવા જેવું ઝગડતા હોઇએ.
આંસુની અધિકૃત વિક્રેતા છે થોડી આંખ આ ?
ખાત્રીપૂર્વકનું ને જથ્થાબંધ ક્યાંથી રોઇએ !
પૂર માટે માત્ર સ્થાનિક વાદળો પૂરતાં નથી,
કંઇક ઉપરવાસમાં વરસાદ જેવું જોઇએ.
ખાઇ પીને નાહીને કવિતા નથી બનતી હે દોસ્ત !
લોહી વહે ત્યારે જ કાગળ વચ્ચે ધરવો જોઇએ.
- મુકુલ ચોકસી
અંદરથી કોઈ મરી પરવારે તેણે ખુલ્લી આંખોના અંધાપામાં ખોવાનું જ આવેને ?! અધિકૃત વિક્રેતા , જથ્થાબંધ , સ્થાનિક, … નવાં જ કલ્પનો, તો ચાલુ ટ્રેને બારી પાસે બેસવાની લડાઈની વાત – ગઝલને તો ખાઇ પીને નાહવા જેવી જ સરળ બનાવી દે છે. પણ લોહી વહે ત્યારે જ કાગળ વચ્ચે ધરવો જોઇએ…. વાંચીને અંદર ક્યાંક કશુંક જીવતું … તરત બાગમાં પથ્થર બનીને જન્મ લેવા તૈયાર થઈ જાય છે.
.
એકેએક શેર લા-જવાબ …
ચિરયુવાન ગઝલ…
લોહી વહે ત્યારે જ કાગળને આગળ ધરવો જોઈએ
લોહિયાળ અક્ષરોને વાંચતા આવડવું પણ જોઈએ.
અદભુત્…..
જાણીતી અને લોકપ્રિય ગઝલ.
પૂર માટે માત્ર સ્થાનિક વાદળો પૂરતાં નથી,
કંઇક ઉપરવાસમાં વરસાદ જેવું જોઇએ.
ખુબ સરસ.