વરસાદ : અશોક ચાવડા ‘બેદિલ’
આ વખત લાગણીસભર વરસાદ,
આ વખત આંસુઓનું ઘર વરસાદ.
કારણો હોત તો બતાવી દેત,
આંખમાં કારણો વગર વરસાદ.
કોઈ ભીંજાય ક્યાં છે અંદરથી,
શ્હેરમાં હોય છત ઉપર વરસાદ.
ઘરનો સામાન માત્ર ભરવાનો,
પાંપણોમાં ભર્યા ન કર વરસાદ.
‘સ્હેજ રોકાઈ જા’ : તને કીધું,
‘સાવ તાજી હજી કબર’ : વરસાદ.
- અશોક ચાવડા ‘બેદિલ’
અડધો શ્રાવણ તો કોરો જ વહી ગયો…. જોકે, અશોકભાઈ કહે છે એમ, વરસાદ હોય તો પણ - કોઈ ભીંજાય ક્યાં છે અંદરથી, શ્હેરમાં હોય છત ઉપર વરસાદ. પણ ’ આ વખત’ તો વરસાદ એટલે, આવું જ કંઈક સમજી મન મનાવવું પડે એવો કમોસમી માવઠાં જેવો વરસાદ વરસ્યો. હા… વૅબમહેફિલ પર હજુ ‘વરસાદ’ વરસે છે અને ભીંજાઈ પણ જશો, કારણકે આજે માણીશું ‘ વરસાદમાં’ રદીફ પર પંદરમી ગઝલ રાજેન્દ્ર પાઠકની કલમે. ( સાભાર : પ્રવિણભાઈ )
.
વાહ અશોક! ત્રીજો અને ચોથો શેર તો અદભુત!
ઠીકાઠીક ગઝલ. બધા બ્લોગો પર એક સરખી વરસાદી કવિતાઓનો એટલો મારો થઈ ગયો કે હવે કંટાળો આવે છે.
સુંદર ગઝલ…
‘સ્હેજ રોકાઈ જા’ : તને કીધું,
‘સાવ તાજી હજી કબર’ : વરસાદ
સુંદર રચના!
સપના
વરસાદ અને તે પણ લાગણીસભર — ધરતી સાદ પાડે અને વરસાદ વરસે ત્યારે જરૂર વરસાદ મન મૂકીને વરસે .. આ વર્ષે ચોક્કસ એને કઈક ખોટું લાગ્યું હશે…માનવ પર્યાવરણ અને પ્રકૃતિ બંનેનું ‘વ્યાપારીકરણ’ કરતો હશે એવી મેઘને ખબર પડી ગઈ હશે..
થૈ અષાઢી ‘અશોક’વરસે છે..શબ્દમાં ન્હાય તર-બતર વરસાદ!!! માણવી ગમે તેવી રચના.
સરસ વરસાદી ગઝલ……………