ગમતાંનો કરીએ ગુલાલ : મકરંદ દવે
ગમતું મળે તો અલ્યા ગુંજે ન ભરીયે, ને ગમતાંનો કરીએ ગુલાલ.
આડા દે આંક એ તો ઓશિયાળી આંગળી,
પંડમાં સમાય એવી પ્રીતિ તો પાંગળી,
સમદરની લ્હેર, લાખ સૂણી ક્યાંય સાંકળી ?
ખાડા ખાબોચિયાને બાંધી બેસાય, આ તો વરસે ગગનભરી વ્હાલ.
- ગમતાંનો કરીએ ગુલાલ.
ગાંઠે ગરથ બાંધી ખાટી શું જિંદગી ?
સરીસરી જાય એને સાચવશે કયાં લગી ?
આવે તે આપ કરી પળમાં પસંદગી,
મુઠ્ઠીમાં રાખતાં તો માટીની પાંદડી ને વેર્યે ફોરમનો ફાલ.
- ગમતાંનો કરીએ ગુલાલ.
આવે મળ્યું તે દઈશ આંસુડે ધોઈને,
ઝાઝેરું જાળવ્યું તે વ્હાલેરું ખોઈને,
આજ પ્રાણ જાગે તો પૂછવું શું કોઈને ?
માધવ વેચતી વ્રજનારી સંગ તારા રણકી ઊઠે કરતાલ !
- ગમતાંનો કરીએ ગુલાલ.
- મકરન્દ દવે
સાંઈકવિ મકરન્દ દવેનાં જન્મદિને તેમનું એક બહુ જ જાણીતું ગીત.. ! જેમાં ગમતાંનો ગુલાલ એ રુઢિપ્રયોગ તો ગીત કરતાં પણ વધુ જાણીતો… ! ઇન્ટરનેટ પર તો ખા…સ. જોકે, આખું ગીત જ બ્લૉગજગતને (અમને) સમર્પિત કરવાનું મન થાય એવું જ છે. 
ગમતું મળે તો પે’લા ભમરાની જેમ ગૂંજન કરતાં કરતાં ગજવે કેમ ભરાય ? ગમતું મળ્યાનાં આનંદનો ઓચ્છવ જ હોયને….. જે ગુલાલથી એકબીજાને રંગી કે એકબીજાનાં રંગમાં રંગાઇ મનાવવો જ રહ્યો.
શબ્દાર્થ : આંક – કિંમત, મૂલ્ય. પંડ – ખુદ. ગરથ – મૂડી, સંપત્તિ. (સંસ્કૃત) ગ્રંથિ – ગંઠાવું, તાડપત્રો પરનાં લખાણોને વચ્ચે કાણું પાડી તેમને દોરીમાં પરોવી બે બાજુ ગાંઠ મારવામાં આવે તે ગ્રંથ - પૈસા, નાણું પણ ગાંઠ મારીને સચવાય એટલે કે મૂડી. * કહેવત - ગરથ ગાંઠે ને વિદ્યા પાઠે.
.
સરસ અઁજલિ…
સાંઈ કવિશ્રી મકરંદ દવેને જન્મ-દિવસ પર હૃદય પૂર્વક અંજલિ!
એમના ખૂબ જ જાણીતા ગીતનો ગુલાલ માણવાની મજા આવી!
સુધીર પટેલ.
વાહ્…રવિવારની સવાર સુધરી ગઈ. મકરન્દ દવે એ અતિશય ગહન વાત કેટલા સરળ શબ્દોમાં કહી છે અહિં… આભાર પિન્કીબેન…
સાંઈ ક્વિનું સદાબહાર ગીત.
ગરથ – મૂડી, સંપત્તિ
શ્રી મકરંદ દવેજી ને નંદિગ્રામમાં ૩ વાર મળવાનું થયું હતું.
એમની મહેફિલ માણિ હતી.
ગીતે જુના સંભારણાં કરાવ્યાં.
આભાર.
વિનોદ પ્રજાપતિ.
શ્રી મકરંદ દવેને આદરપૂર્વક સ્મરાંણજલી………સરસ ગીત મુકવા માટે આભાર……….