તારી હથેળીને દરિયો માનીને : તુષાર શુક્લ
( ખજૂરીની છાયામાં … ! )
તારી હથેળીને દરિયો માનીને કોઇ ઝંખનાને સોંપે સુકાન,
એને રેતીની ડમરીનો ડૂમો મળે, એનો અલ્લાબેલી.
ખજૂરીની છાયામાં વરસે છે ઝાંઝવા ને વેળુમાં તરસે છે વ્હાણ;
કૂવાથંભેથી હવે સોણલાં રડે ને કોરી આંખોને અવસરની જાણ.
તારી હથેળીને રેતી માનીને કોઇ ઊંટોના શોધે મુકામ;
એને કોરીકટ માછલીની જાળો મળે, એનો અલ્લાબેલી.
કોની હથેળીમાં કોનું છે સુખ, કોને દરિયો મળે ને કોને રેતી ?
વરતારા મોસમના ભૂલી જઇને, એક ઝંખનાને રાખવાની વ્હેતી.
તારી હથેળીને કાંઠો માનીને, કોઇ લાંગરે ને ઊઠે તોફાન;
એના ઓસરતી વેળુમાં પગલાં મળે, એનો અલ્લાબેલી.
- તુષાર શુક્લ
કચ્છમાં રણોત્સવની ઉજવણી ચાલે છે, ત્યારે તુષારભાઈનું આ ગીત મને યાદ આવી ગયું. જોકે, વાત તો રણની નહિં, પ્રિયજનની જ છે. પણ પ્રિયજન વિના, જિંદગીની ઉજ્જડતા માઇલો વિસ્તરેલ રણ કરતાં પણ વધુ જ હોય. રણ અને તેને સંલગ્ન પ્રતિક, કલ્પનો કે કાકુ કવિએ વ્યંજનાત્મક રીતે પ્રયોજ્યાં છે કે પ્રણયની દર્દ-એ-દાસ્તાઁ નખશિખ આ ગીતમાં ઉતરી આવી છે.
( ઑડિયો : રાસબિહારી દેસાઈ અને સૌમિલ મુન્શી )
શબ્દાર્થ : વેળુ – રેતી. કૂવાથંભ – વ્હાણના વચલા સઢનો મુખ્ય થંભ (થાંભલો).
.
the attachments to this post:
ran_khajuri
ran
હસ્યાક્ષર આલ્બમમાંના મારા ગમતાં ઢગલોક ગીતોમાંનું આ એક… સાંભળો સાંભળો ને તોય થાક જ ન વર્તાય…
તુષારભાઈના ઉત્તમોત્તમ ગીતોમાંનું એક. વારંવાર સાંભળવાનું મન થાય. બન્ને રેન્ડિશન્સ સરસ છે.
બહુ સુઁદર કાવ્ય-મને પીક્ચર પણ ગમ્યુઁ અભિનઁદન.
ખૂબ જ સુંદર પ્રતિકોથી સભર અભાવનું લયાત્મક ગીત! અને એટલું જ સરસ રણનું ચિત્ર!
આભાર, પીંકીબેનનો!
સુધીર પટેલ.
પ્રિયજનના હાથને હાથમા લઈને વ્યક્ત કરેલી દિલની ભાવનાઓ સરસ વાત કહી જાય છે, જેમણૅ હસ્તાક્ષર કેસેટ સાભળી હોય તે જ વધારે અનુભવી શકે…….આભાર
અહા! ખૂબ જ સુંદર..
Thanks a lot Pinki,
I was not confortable to write in gujarati so replying in english. I heared this song years back on Akashvani Surat & amp; i was searching the lyrics of this song since than…beautyfull wordings superb composition..Tushar is simply great. Tapan D.
તુષારભાઇ,
શુઁ લખુઁ? ભૈ, તમારા ગીતો અમસ્થાય ગમે એટલે મૉજ આવી કહુઁ …
- પઁકજ ત્રિવેદી
‘એનો અલ્લબેલી…’ગીત અહીંથી વિસ્તર્યે જ જાય છે..