રસ્તો થઈ જશે : સુનિલ શાહ
પગલું મૂક્યું છે તો રસ્તો થઈ જશે,
માપવાનો ખુદને, મોકો થઈ જશે.
એક બારી હું ઉઘાડું, એક તું,
સામસામે રાહ ખુલ્લો થઈ જશે.
તું પુરાવા પ્રેમના માંગીશ ના,
સ્પર્શ કેવળ કર, ભરોસો થઈ જશે
ડાળ તૂટી, વૃક્ષને ધ્રાસ્કો પડ્યો,
છાંયડો કોઈને ઓછો થઈ જશે.
તું વહે છે, તો વહ્યા કરજે સતત,
ભીતરી મૃગજળનો દરિયો થઈ જશે.
લાગણીનો ચાલ, માળો ગૂંથીએ,
શ્વાસ તારો, શ્વાસ મારો થઈ જશે. (તા.ક.)
- સુનિલ શાહ
સુનિલભાઈ પગલું મૂકી રસ્તો શોધવાની વાત ખુમારીપૂર્વક કરે છે, તો ભીતરી નકારાત્મક ભ્રમણાઓનાં ‘મૃગજળ’ને દરિયો પણ બનાવી દે છે. ડાળ તૂટે તો ય ધ્રાસ્કો તો એમ જ પડ્યો, કે કોઈનો છાંયડો ઓછો થઈ જશે. અને એ જ તો ખુદને માપવાનો મોકો છે. ખુદા માટે પણ… આપણને માપવાનો મોકો… !!
.
સુંદર ગઝલ
મજાની ધનમૂલક ગઝલ…
બધા શેર સ્પર્શી જાય એવા થયા છે…
ગઝલની સરળ ભાષામાં ગહન વાત!
સુનિલભાઈને અભિનંદન!
સુધીર પટેલ.
આ સુનિલ શાહ દિવસે દિવસે ખૂબ ઊંચી ગઝલો લાવે છે.દિલ ખૂશ થૈ ગયું. પિન્કીજી તમને પણ અભિનંદન.
ખુબ જ ઉમદા ગઝલ—સુનિલ શાહ ને મારા ખાસ અભિનન્દન! રોહિત પટૅલ
આખી ગઝલનું એક અલગ પ્રકારનું ભાવવિશ્વ ખડું થયું છે જેમાં દરેક શૅરને પોતાનું આગવું અર્થ-ઘર છે.
શ્રી હરનીશ જાનીજીની વાત સાથે હું પણ ૧૦૦% સહમત છું કારણ કે,અંગતરીતે કવિની ક…. કવિતાનો ક થી લઈ…..શરૂથયેલ કાવ્ય યાત્રાના વિકાસ,વિસ્તાર અને વૈભવનો સાક્ષી રહ્યો છું.
-અભિનંદન સુનીલભાઈ
બહુ સરસ્….રચના અને વિચાર પણ્…
વાહ સુનિલભાઈ..સરસ ગઝલ…
હરનીશ ભાઈ ની સાથે હું પણ સમંત છું કે આ ગઝલ ખુબજ સુંદર છે. સુનિલ શાહને મારા અભિનંદન. દરેક શેરનો પોતાનો ગહન અર્થ છે અને વાંચીને મજા આવી ગઈ.
મહેશ જોશી
સુંદર ગઝલ.
“ડાળ તૂટી, વૃક્ષને ધ્રાસ્કો પડ્યો,
છાંયડો કોઈને ઓછો થઈ જશે.”
પ્રતિભાવો દર્શાવનારી પ્રોત્સાહિત કરનારા તમામ વડીલો, મિત્રોનો હૃદયથી આભાર…
શ્રી સુનિલભાઈને સરસ અર્થસભર ગઝલ આપવા માટે અભિનદન અને આપનો આભાર……