આ પ્રથમ વરસાદ છે : ઉર્વીશ વસાવડા
સૌ પલળવા બહાર આવો, આ પ્રથમ વરસાદ છે,
વૃક્ષને અનહદ વહાલો, આ પ્રથમ વરસાદ છે.
કેમ મહેંકે છે ધરા પહેલા ટીપાના સ્પર્શથી,
પૂછ મા એવા સવાલો, આ પ્રથમ વરસાદ છે.
દેડકો, કોયલ, બપૈયા, સૂર છેડે છે ભીના,
રાજવી એનો રસાલો, આ પ્રથમ વરસાદ છે.
જે અભણ હો એ ય પણ વાંચી શકે એને સહજ,
નેહ નીતરતી ટપાલો, આ પ્રથમ વરસાદ છે.
આભથી ટપકેલ અમૃત તરબતર કરશે બધું,
તું ભરી પી લે પિયાલો, આ પ્રથમ વરસાદ છે.
- ઉર્વીશ વસાવડા
આંખોમાં બેઠેલાં ચાતક, તરસી નજરે, ચોમાસુંને આસપાસ ક્યાંક શોધે તે પહેલાં જ , તપ્ત ધરાને તૃપ્ત કરવા મન મૂકીને મેઘ આજે ગુજરાતમાં ઘણી જગ્યાએ વરસ્યો. ચાળીસ વર્ષોની રેકોર્ડ-બ્રેક ગરમી પછી, વરસાદે આજે ‘સરપ્રાઇઝ’ આપીને સાચે જ તરબતર કરી દીધાં. જો કે, કોયલનાં ટહુકાઓ, ઘેરાયેલા વાદળો કશુંક તો મનગમતું થવાની આશા રાખતું જ હતું ! માળિયામાં પડેલ રેઇનકોટ, છત્રીને બહાર કાઢવાનું જ યાદ આવ્યું ? પણ એ પહેલાં, પ્રથમ વરસાદની ભીની માટીની મીઠી સુગંધ માણવાનું આપ સૌને એક ભીનું ભીનું ઇજન….. સૌ પલળવા બહાર આવો, આ પ્રથમ વરસાદ છે.
.
the attachments to this post:
varsad
વરસાદી ભીંજાસ અત્રે કેનેડામા માણી રહ્યા હોય એવૂ સરસ કાવ્ય, આભાર અને કવિશ્રીને અભિનદન……
ઉડી થોડી ડમરીઓ ધૂળની,
ઢાંક્યું આકાશ વાદળે,
થઈ છે થોડી જરુર ઠંડક
વર્ષારાણી તો દૂર છે.
તારીખ ૦૨-૦૬-૨૦૧૦ સમય ૪=૩૨ પીએમ
ખરેખર.. તરબતર થઈ જવાયું.
આજે જ દાર્જીલીંગથી પરત આવ્યો છું. અને ડીસામાં ધોધમાર વરસાદ પડી રહ્યો છે. ઉપરથી આ ગઝલ મઝા પડી ગઈ
સુંદર ભીની ભીની ગઝલ…
પહેલા વરસાદની સૌને શુભકામનાઓ..
સહુને મોસમનો પહેલો વરસાદ મુબારક. સુંદર ગઝલ.
વાહ સરસ પહેલા વરસાદમા ભીના થવાનુ ગમ્યુ.
સરસ ગઝલ.
મઝાની ગઝલ