આ વાદ કે તે વાદ : પ્રતિભા ઠક્કર
.
.
આ વાદ કે તે વાદ
ક્યારેય ના પૂછશો
કારણ કે હું કોઈ વાદ ની જાયદાદ નથી
મેઘધનુષી રંગોની મ્હોરતી ક્ષણોને
સાંકળો નહીં તમારા વાદ સાથે
આ કેસરીયો રંગ પોકારે છડી
સૂર્યોદય અને સૂર્યાસ્તની
ઊડતું શ્વેત કબૂતર દર્શાવે શાંતી નો રંગ,
લીલો રંગ હરિયાળી નો
આ લાલઘૂમ રંગ મારા લોહીનો
રંગો પર કબજો જમાવી
એ શયતાનોએ સર્જી છે
વણલખી વિકૃતિ
એનાથી નથી દોરાતી કોઈ
સુરેખ આકૃતિ..
કુદરત સાથે ના તાદાત્મ્ય ને તોડી નાખવાના કાવતરા નો
કોઈ નહીં બનતા ભોગ,
એ તો છે એક મોટો રોગ
અરે….
આમ અટ્ટહાસ્ય કેમ કરો છો ?
કાળો રંગ જોઈ ને ?
એ કામ નહીં કરનાર
કામચોરોનું પ્રતિક માનો છો તમે ?
ના… ના… હું એવું નથી માનતી
એ તો મારા મસ્તક નો રંગ
ચમકારો થયો ને ?
સોનેરી ને રૂપેરી રંગો
એ પણ સમજી લો
એ મૂડીવાદનાં રંગો નથી
આ તો છે વીજળી નો ચમકાર
લો હવે એ મેઘવર્ષા થશે
ને તમારા મેલા વિચારો ને લાવો એ મેઘવર્ષા માં ધોઈ નાખીએ
ને રેલાવીએ સંવાદિતા નાં સૂર
સમજણનાં સામ્રાજ્યમાં
- પ્રતિભા ઠક્કર
.
.
હા… આપણે આપણાં જ વર્તુળમાં રહી, મેઘધનુષી રંગોને માણી શકીએ પણ તે વર્તુળનું કેન્દ્ર આપણે માત્ર જ છીએ અન્ય નહીં. શક્ય છે અન્યનાં વર્તુળની ત્રિજ્યા મોટી પણ હોઇ શકે અને નાની પણ. પણ આપણે તો સ્વકેન્દ્રી બની, પૂર્વગ્રહથી પીડાઇ, કોઇ ‘વાદી’ બની જતાં વાર નથી લાગતી. અને આ વાદ ને વિવાદ બનતાં વાર નથી લાગતી. બસ , મેઘવર્ષામાં આવાં ‘વાદ-વિવાદ’ ને ધોઇ સંવાદિતાનાં સૂર લગાવી, સુંદર લયાન્વિત અછાંદસને માણીએ !
પ્રતિભા ઠક્કર, પઝલનો માણસ છું – કથાસંગ્રહનાં રચયિતા છે અને આર.જે. , ટીવી આર્ટીસ્ટ મેઘા ઠક્કરનાં મમ્મી છે . આજની પેઢીને આ ઓળખાણ સરળ પડશે. 
.
.
.
સરસ અભિવ્યક્તિ…..
સરસ!