રેતમાં તરવા જવાની જીદમાં,
તરફડ્યા, જળ ત્યાગવાની જીદમાં.

જાતથી નારાજ કેવા થઇ ગયા !
સૌને રાજી રાખવાની જીદમાં.

વાસણો દોર્યા અભેરાઇ ઉપર,
ખાલીપો સંતાડવાની જીદમાં.

લ્યો, વરસનાં વ્હાણ ડૂબ્યા હાથમાં,
હસ્તરેખા લાંઘવાની જીદમાં.

છેવટે ઘરને ય સળગાવી દીધું,
આંગણું અજવાળવાની જીદમાં.

- મિલિન્દ ગઢવી

સરળતા અને સહજતાથી પરિસ્થિતિનો સ્વીકાર ન કરી શકતાં આપણે સૌએ અંતે તો જીદમાં -  કશુંક ગુમાવવાનો જ વારો આવે છે.   તો સૌને રાજી રાખવામાં ‘જાત’ ને પણ ગુમાવવી પડે છે.

.