નિસરણીઓ

નીસરી

ભૂકંપિત

બજારમાં

મકાનો

ગોતવા

અને

મન્દિરો

મળ્યાં

ત્યાં

શિખર

વિહોણાં

બાવન

ગજની

ધજાઓને

વીંટઈ

સૂતેલાં

શું

ગાઉં

મારો

રાવણહથ્થો

ધરબાઈ

પડ્યો છે

કો’ક

અજાણ્યા

પગથિયામાં.

-  રાધેશ્યામ શર્મા

છવ્વીસ જાન્યુઆરી એટલે પ્રજાસત્તાકદિન સિવાય ભૂકંપદિન ? પણ ખરો….એ સવારે કચ્છ અને અમદાવાદમાં આવેલ ભૂકંપમાં જેણે પોતાનાં મકાનો,દુકાનો અને સગાવ્હાલાં ગુમાવ્યા છે તેઓને તો જીવનપર્યંત આફ્ટર શૉક આવ્યાં જ કરવાનાં…… ભૂકંપે મનમાં પાડેલી તિરાડો ક્યારે અને શેનાથી સંધાશે ?!! કોઈ કચ્છી માંડુને પોતાના ધરબાઈ ગયેલા રાવણહથ્થા વિના હજુ ગાવાનું મન થતું હશે ? 

અને હા…. વફા સા’બે પોતાનાં બ્લૉગ પર મૂકેલ આ દેશભક્તિનાં ગીતો સાથે પ્રજાસત્તાક દિન નિમિત્તે ખૂબ ખૂબ શુભેચ્છાઓ …….

.

ઉદાસી દિવસ-રાત કોઠે પડી છે ;
તિરાડો ઘણી ઘરની ભીંતે પડી છે.

પરિસ્થિતિ આ રીતે થાળે પડી છે;
ગલીમાં ખુશી ઊંધે માથે પડી છે!

વિધાતાની પગલીનો નકશો તો ન્યારો,
કરચલીઓ ઊંડી કપાળે પડી છે!

ગયું વરસી વાદળ ને સૂરજ ઝળુંબ્યો;
કે મોતીની માળાઓ તડકે પડી છે.

એ આવે ને ઉદ્ધાર એનો કરી દે ;
હયાતી મરણને ભરોસે પડી છે.

- ભગવતીકુમાર શર્મા

સમય જતાં ઘરની ભીંતોમાં પડેલી તિરાડો કરતાંયે મનમાં,સંબંધમાં તિરાડો વધુ ઊંડી અને પહોળી પડતી જતી હોય છે. તો શરીરરૂપી ઘર પણ સમયની ઝાપટો કેટલી ખાઈ શકે છે ? અને દરેક સ્થિતિ અંતે ઉદાસીમાં પરિણમે છે. પરિસ્થિતિ થાળે પાડવા કમને સમાધાન કરવું પડે છે ખુશી ગુમાવીને. પણ આ તારું, આ મારું છોડી જો આપણુંની ભાવના સર્જી સમાધાન કરીએ તો ? વૃદ્ધત્વની કરચલીઓ એ તો વિધાતાએ જીંદગીમાં પાડેલાં તેનાં પગલાંની નિશાની છે, એમ કહી ઈશ્વરની એકહથ્થુ સાર્વત્રિક સત્તાનો સ્વીકાર કરે છે. તો અસ્તિત્વ છે તેનો નાશ છે જ અને આથી જ તો મારો, તમારો નહીં હયાતીનો ઉદ્ધાર કરી દે. અને આમ પણ હયાત તો બસ પરમચેતનરૂપ આત્મા જ રહે તો આત્માનો જ ઉદ્ધાર ઈચ્છીએ જેથી જન્મોજન્મનાં બંધનમાંથી મુક્તિ મળે .