થાય છે : ફિલિપ ક્લાર્ક
Friday, April 17th, 2009
થાય છે એ ક્યાં બરોબર થાય છે ;
ગોઠવો ઈંટો કદી ઘર થાય છે ?
રાહ જોતું જાય મોકાનું જગત,
કામ જ્યારે હોય આદર થાય છે.
કેટલાંયે આંસુઓ પીધા પછી,
આજ ભીનું ગામ પાદર થાય છે.
થાક જેવું લાગતું એને હશે,
રેતનાયે ક્યાંક તો થર થાય છે.
હળવું મળવું ને વિખૂટા થૈ જવું,
આપણા હિસાબ સરભર થાય છે.
બારી વિના કોઈને ક્યાં ચાલતું ?
આમ ભીંતોનું જ ચણતર થાય છે.
ખોરડું તો ભોંય ભેગું થૈ ગયું,
રોજ રાતે કોની હરફર થાય છે.
આપણે મોડા પડીને પૂછીએ,
થાય છે એ ક્યાં સમયસર થાય છે ?
- ફિલિપ ક્લાર્ક
આ તો મારી અને તમારી જ વાત !! આપણી રોજબરોજની અકળામણ કવિએ ગઝલમાં બખૂબી પેશ કરી છે. થાય છે એ ક્યાં બધું બરાબર થાય છે ? સાલું કો’ક તો છે, આવ ભાઈ હરખા, આપણે બે સરખાને નાતે -પહેલી પંક્તિથી જ એવો ઘરોબો કેળવાઇ જાય, અને suspense movieની જેમ અંતમાં પહેલી પંક્તિનો જવાબ ખૂલે -
” આપણે મોડા પડીને પૂછીએ,
થાય છે એ ક્યાં સમયસર થાય છે ?….!!!
.
